Hindi araw-araw ay makakakita ng isang kabayo na tumatakbo sa kalagitnaan ng isang major thoroughfare at nakikipagkarera sa mga PUVs, bus, truck, at iba pang uri sasakyan.
Kaya viral agad ang video ng kabayo—isang bisiro—na nakunang tumatakbo sa North Luzon Expressway (NLEX) gabi ng Biyernes, May 19, 2023.
Nakapalitan ng mensahe ng PEP.ph (Philippine Entertainment Portal) ang pamangkin ng may-ari ng bisiro nitong Martes ng gabi, May 23, 2023.
Ikinuwento ni Kenneth Kurt Soriano Villarica, 23, isang dog trainer at dog whisperer, na three months old ang bisirong si Trixie.
“Sa nangyari po sa kanya, napalitan na po ng NLEX or Express,” ani Kenneth pagtukoy sa pangalan ng bisiro.
“Ilan dekada na po kami nag-aalaga [ng mga kabayo], ngayon palang po talaga nangyari ito."
Ang tiyuhin ni Kenneth ang nagmamay-ari ng bisiro at ng nanay nito.
“Kutsero po tito ko sa pangangalesa po sa siyudad po ng San Fernando at pang-karo din po.”
Si Kenneth ay may alaga ring isang kabayo. Tatlo lahat ang kabayo.
READ:
- Hustisya para kina Marshall at Millions, mga asong pinagbabaril ng pulis
- Aso shock na shock nang ginising ng rhino; lumipad pati kaluluwa sa takot!
- Shocking! Tunay na itsura ng langgam, iba pang insekto via microscope photography
Paano napadpad si Trixie sa NLEX?
Ang kuwadra kasi ng tatlong kabayo ay nasa ilalim mismo ng NLEX.
“Kasi bisiro pa po, hindi pa po siya puwedeng itali talaga, kaya nakakawala lang po sa kuwadra at nasunod lang po sa nanay niya.”
May posibilidad daw kasi na mabigti ang bisiro kung itatali.
Ang three-month-old pony na si Trixie kasama ang kabayo ni Kenneth na nakahiga (background) sa kuwadra, na nasa ilalim mismo ng NLEX.
“Habang nakatali nanay niya, parang gumala po siya sa paligid ng gabi.
“Tapos nung wala na makita damo sa baba, umakyat sa itaas ng NLEX dahil may pagkain at damo po dun.”
Sa report ng News5, inilarawan ni Robin Ignacio, senior manager for Traffic operations ng NLEX/SCTEX, kung paano nakalusot sa harang ang bisiro at napunta sa NLEX.
“Nakita na yung fence, nagkaroon ng maliit na breach. Medyo natumba, nag-lean yung fence namin doon. At doon nakalusot yung maliit na kabayo,” ani Ignacio.
CATCHING THE PONY
At dito na nga nakita at nakunan ng video ng ilang netizens ang tumatakbong bisiro.
Umabot ng pitong kilometro ng itinakbo nito bago nahuli ng NLEX personnel.
Sabi ni Kenneth, “Nung kinuha po namin siya ng gabi sa Barangay Sta. Monica, San Simon, pawis na pawis po at masakit po paa kasi tumakbo po siya ng nasa 7km.
“Nasa around 12:30a.m. na po namin siya nakuha nun.”
Nang mahuli ng NLEX personnel ang pony na si Trixie
“Yung nalusutan po niya na bakod, inayos po kaagad ng pamunuan po ng NLEX para hindi na makalusot at maulit po.”
Napagdesisyun daw nina Kenneth na itali na ang bisiro para hindi na maulit ang pangyayari.
“Ngayon po ayos na po lagay niya,” paniniyak ni Kenneth.
