Unti-unting nakaka-agaw ng pansin ang video ng pari at mga sakristan na sumasayaw sa saliw ng viral TikTok song na “Ting Ting Tang Tang.”
Ang video ay kinunan sa Simbang Gabi sa isang parish church sa Danao City, Cebu kamakailan.
Sa short video clip na in-upload ni Yeng Abinales noong December 18, 2022, makikita ang pari na nasa harap ng altar habang ang kanyang mga sakristan ay nakaposisyon sa iba-ibang bahagi ng simbahan sa harap ng congregation.
Tumugtog ang viral hit song na “Ting Ting Tang Tang” at gumiling ang pari at mga sakristan ng usong dance steps.
Sa simula ay maririnig ang pagtawa at paghiyaw ng mga dumalo ng misa.
Ngunit samu’t saring reaksiyon ang nakuha ng video na ito mula sa netizens: may mga natawa, may mga nalungkot, at may mga nagalit.
DANCE TO RAISE FUNDS
Bukod dito, may iba pang post na videos si Yeng na kuha rin sa nasabing Simbang Gabi.
May medley of songs na ipinatugtog, tulad ng remixed version ng “Jingle Bells” at "Ang Pasko ay Sumapit,” at ito ang sinayawan ng pari at ng mga sakristan.
Kinumpirma ni Yeng sa PEP.ph (Philippine Entertainment Portal) na ang effort na ito ng pari ay isang form of caroling bilang fundraising ng simbahan.
“It was a form of fund raising through caroling to support Church's projects and help church employees who are poor,” sabi ng uploader.
Mahihinuhang sinabi rin ito ng pari sa wikang Cebuano bago sila pumuwesto sa harap ng altar, at saka sumayaw.
NETIZENS REACT
Dismayado si Yeng sa ginawang ito ng pari at mga sakristan dahil ang simbahan daw ay designated place of worship at tinuruan ang mga taong mag-behave.
Hindi rin siya sang-ayon sa “non-liturgical music” sa ipinatugtog sa simbahan.
Ang post na ito ng uploader ay mayroon ng 964,000 views at 10,000 reactions. May higit 6,000 ang pumindot ng “laughing” reactions, halos 2,000 “sad” reactions, at higit 1,000 ang “angry” reactions.
Sa ilang nag-iwan ng komento, mababakas na hindi sila na-entertain sa pakulong ito.
Base sa mga komento, ikinadismaya ng netizens ang ginawang sayaw. Para sa kanila, hindi akma ang ginawang performance sa simbahan.
May isa naman na sinabing pinapalaki lamang ang isyu.
Ang “Ting Ting Tang Tang” ay ang kasalukuyang usong TikTok dance challenge.
Remixed version ito ng Vietnamese pop song na “See Tinh,” na ang ibig sabihin ay See Love. Kinanta ito ng Vietnamese singer-actress na si Hoang Thuy Linh.
Sa Vietnamese, ang “Tinh Tinh” ay nangangahulugang “love,” habang ang “Tang Tang” naman ay “love you.”