Nag-viral noong September 10, 2022, ang pedestrian lane sa Tayuman Street, Sampaloc, Manila, dahil ang dulo nito ay may harang na railing.
Ang larawan ay naka-post sa The Passenger Forum Facebook Page, at nai-share ng netizens.
Umani ito ng samutsaring kritisismo.
Kabi-kabila rin ang naging batikos sa kung sinuman ang may pakana ng nasabing proyekto—kung proyekto nga bang matatawag ito.
Nagsisiksikan tuloy ang mga tumatawid sa gilid dahil sa harang.
Reklamo pa ng mga nakaranas tumawid, maraming nakamotorsiklo ang humahagibis kung dumaan dito kaya talagang delikado sa pedestrians.
Batay sa May 2022 photo mula sa Google Street View, mapapansing hindi makakadiretso ang sinumang tatawid at kailangan pang pumunta sa gilid na kanto ng kalye.
May mga netizens na nagsabing noon pa nga nila napapansin ang kakaibang sitwasyon na ito, hanggang mag-trending at maging viral ngayong September.
Batay naman sa mga larawan na muling lumabas noong September 21, wala nang harang sa tawiran, pero kapiraso lang ng railings ang nilagari, at hindi swak sa laki ng lane kaya hassle pa rin.
Matapos muling punahin ng netizens, mas lumaki na ang butas at akma na sa sukat ng lane.
Yun nga lang, sagabal pa rin ang poste ng kuryente, ang pedestrian crossing sign, at nakatambak na basura.
Pero at least ay hindi na ito totally sarado at ika nga ng netizens ay “stupid.”