Naging instant idol ng netizens si Tatay Renato Tatoy Malones, 50, residente ng Bulado, Guihulngan, Negros Oriental.
Isa siyang spearfisher o gumagamit ng pana sa panghuhuli ng isda.
Ang isang pambihira kay Tatay Renato, putol ang kanyang kanang paa.
Gayunpaman, kaya niyang sumisid ng hanggang 60 feet para mamana ng isda.
At kadalasan niya itong ginagawa tuwing gabi dahil mas marami siyang nahuhuling isda.
Ayon sa post ng Panglao Alona Spear noong September 9, 2022, isang Facebook group tungkol sa spearfishing, 10 years old si Tatay Renato nang mabundol ng isang sasakyan.
Ang aksidenteng iyon ang naging dahilan kaya naputol ang kanyang kanang paa.
Hindi na siya nakatapos ng elementary, at Grade III lang ang kanyang naabot.
Nagsimula naman siyang mag-spearfish noong 15 years old siya.
Dito niya binubuhay ang kanyang pamilya, at kumikita siya ng PHP300 kada araw.
Bukod naman sa spearfishing, mahusay ring umakyat sa puno ng niyog si Tatay Renato.
Kaya labis-labis ang paghanga ng netizens sa kanya.
Marami ang nagsabing si Tatay Renato ang dapat pamarisan na kahit may kapansanan ay nagbabanat ng buto at binubuhay ang pamilya sa sariling sikap.
May mga concern naman sa kanyang safety, nagsabing mag-iingat siya palagi.
May mga nagsabi namang sana ay matulungan siya ng mga ahensiya ng gobyerno at mga pribadong indibidwal sa kanyang gamit sa pangingisda.
Kahanga-hanga ka, Tatay Renato.