Ikinabahala ng mga residente sa Zamboanga City ang paglipana ng mga higanteng paniki sa kanilang lugar.
Ang laki kasi ng mga ito ay umaabot ng halos isang dipa o isang metro.
Kilala bilang flying foxes, sila ay dumadapo at bumibitin sa malalaking puno ng acacia sa kalye ng Kalye Valderosa, Pettit Barracks sa Zamboanga City.
Nakaramdam ng pangamba ang mga residente sapagkat ito ang unang beses nilang makakita ng ganoon karami at kalalaking paniki.
Isang netizen ang nag-post sa social media ng kuha niya ng di mabilang na giant bants na nakalambitin sa isang puno ng acacia sa Zamboanga City.
Sabi Ramil Rafols sa ulat ng GMA Regional TV One Mindanao, “Nagulat kami. First time silang makita dito. Naging instant tourist spot na ngayon.”
Sabi naman ni Danile Rafols: “Nakakaalarma. Sobrang laki nila at hindi namin alam kung saan galing.”
Nangamba ang mga residente dahil unang beses nilang makakita ng ganoon karaming higanteng paniki sa kanilang lugar. Umaabot ng halos isang dipa ang laki ng mga ito.
Ang sabi ng Department Environment and Natural Resources (DENR) Region IX, hindi dapat mangamba sa mga paniking ito.
Sa kabila raw kasi ng kanilang itsura, ang mga ito ay herbivores at kumakain ng mga prutas, bulaklak, at nectar.
Malaki raw ang papel ng mga giant bats sa pollination at seed dispersal ng mga prutas.
Sabi ni Michael dela Cruz, OIC chief, technical services division ng DENR-PENRO (Provincial Environment and Natural Resources Office), may mga flying foxes sa Zamboanga, pero unang beses silang magawi sa siyudad.
Sabi pa ni Dela Cruz, malaki ang posibilidad na nagambala ang natural habitat ng mga ito kaya napadpad sila sa siyudad.
Paalala ni Dela Cruz, “Under the Wildlife Act natin, hindi puwedeng i-disturb kung saan sila dumadaan at yung feeding area ng mga wildlife, lalo na yung nasa mga urban center.
“Naghahanap iyan sila ng shelter. Isa na ang climate change, pero nag-migrate na sila kung saan sila safe."
Samantala, ang flying fox ay isa sa mga pinakamalaking uri ng paniki sa buong mundo.
May scientific name itong Pteropus at tinatawag ding fruit bats.
Sa Pilipinas, mayroong uri ng higanteng paniki na kung tawagin ay giant golden-crown flying fox na makikita sa Southern Philippines.
Related article: Rare bat na mukhang fox at sa Pilipinas lang matatagpuan, namataan sa Masungi Georeserve