Nakatawag ng atensyon ng netizens ang isang puno ng saging dahil umabot sa libo ang bunga nito.
Batay sa ulat ni Kuya Kim Atienza sa 24 Oras ng GMA News noong September 2, 2022, ang nasabing puno ng saging ay itinanim ni Edgardo Borromeo sa Sitio Kamagong, Brgy. Cagsiay Uno, Mauban, Quezon, mahigit 10 years na ang nakararaan.
Nang magsimulang mamunga ang puno, napansin ni Edgardo na pahaba nang pahaba ang nagiging buwig nito, na umaabot nang hanggang dalawang metro at mas dumarami ang bunga.
Ani Edgardo, "Punung-puno ng bunga, siksik, hindi lang siguro dalawang libo ang laman niyan.
“Mahirap kuhanin ang bunga, dikit-dikit."
Ang saging na maraming bunga ay nakunan ng larawan ni Victor Cruz noong August 23, at nai-post niya sa kanyang Facebook account.
“Batag” aniya ang tawag sa kanila sa ganitong klase ng saging.
Mapapansin sa dulo ng buwig na naroon pa ang puso ng saging, kaya maoobserbahan kung gaano karami ang bunga.
Nag-upload din si Victor ng video—na siyang naging viral ngayon sa Internet.
Plano naman ni Edgardo na ipamigay sa kanyang mga kapitbahay ang mga bunga ng saging kapag nahinog na.
Aniya, "Ang daming natutuwa dito. Ang mga bata tuwang-tuwa.
“Sabi ko pag nahinog, kumuha na lang kayo diyan. Pitas na lang kayo."
Ipinaliwanag naman ni Kohlin Lallabban, isang agricultural biotechnologist, na ang variety ng saging na tanim ni Edgardo ay tinatawag na “thousand fingers banana.”
Isa itong normal na variety ng saging na kayang mamunga mula 100 hanggang 1,000 piraso.
Maliliit ang bunga nito kumpara sa ibang saging na nasa merkado.
Karaniwan itong matatagpuan sa Malaysia, Indonesia, at sa Pilipinas.
Read also:
Oldest public high school sa Pilipinas, nagdaos ng 120th founding anniversary