Malagim ang sinapit ni Belendro Bermudez, 57, ng Purok Zigzag 1, Brgy. Santa Lucia, Puerto Princesa City, Palawan.
Noong March 15, 2022 ay natagpuan siyang bangkay at nakahandusay sa daan ng residenteng si Armando Blanca Malubay.
Ipinagbigay-alam agad ito ni Armando sa pulisya.
Batay sa isinagawang imbestigasyon ng Puerto Princesa City Police Station 2 (PS-2), sinabi ni P/Maj. Noel Manalo, hepe ng PS-2, na noong March 14 ay nakainuman ni Belendro sina Edward Bautista Valdez, alyas Nognog; at Jayson Nicar Riomalos, alyas Burdig.
Habang nag-iinuman, sinabi umano ni Belendro kina Nognog at Burdig na kaya niyang i-magic ang hawak na dahon, at gagawin niyang pera.
Ngunit nang sumablay ang magic, nayabangan sa kanya at nagalit sina Nognog at Burdig.
Pinukpok nila si Belendro ng bote at kahoy sa ulo, na naging dahilan ng pagkamatay nito.
March 16, sumuko si Nognog sa mga operatiba ng Criminal Investigation and Detection Group (CIDG), bago ito ibinigay sa kustodiya ng PS-2.
Si Burdig naman ay inaresto habang nasa PS-2 dahil una na itong nasa kustodiya ng pulisya bilang testigo sana laban kay Nognog.
Ngunit sa pagpapatuloy ng imbestigasyon, itinuro ni Nognog si Burdig na siyang naunang pumukpok ng bote kay Belendro.
Sinampahan na ng kasong murder ang dalawang suspek.