Usap-usapan sa social media na in-unfollow nina Sharon Cuneta at Gabby Concepcion ang isa’t isa sa Instagram.
Noon lamang February 7, 2018 ay kinakiligan ng kanilang mga tagasuporta ang pag-follow nila sa isa’t isa sa Instagram.
Maging ang anak nila na si KC Concepcion ay ikinatuwa ang unti-unting panunumbalik ng magandang samahan sa pagitan ng kanyang mga magulang.
Ngunit ngayong araw, April 2, kung titingnan ang Instagram followers ni Sharon ay wala na roon si Gabby.
Wala na rin si Sharon sa listahan ng Instagram followers ni Gabby.
Kapansin-pansin din kagabi, April 1, ang paglabas ni Sharon ng saloobin sa umano’y naunsiyaming pagkakaibigan at nakatakda sanang balik-tambalan nila sa pelikula ni Gabby.
Bahagi ng pahayag ng Megastar, “You will never know how much pain losing what I thought would be a lasting friendship this time has caused me.
“How can only all good intentions go wrong?
“I guess that’s life. And because I trust God, I know that I will understand in time.”
Hindi man tuwirang binanggit ni Sharon ang pangalan ni Gabby, base sa mga sumunod niyang pahayag ay sinabi ng Megastar na umasa siyang magiging magkaibigan sila para sa kabutihan ng kanilang anak.
Sabi ni Sharon, “I never wanted to hurt anyone. I also certainly didn’t expect to be humiliated and hurt.
“I just wanted a forever friend to keep for our beautiful child, and a beautiful movie. Minsan ayaw ng tadhana.
“Again, my trust is in the Lord. Sorry again, and here is to the magic of new beginnings!
“Thank You, Jesus, for Easter. And always, a new day. I love you all. Goodnight. God bless us.”
RENEWED FRIENDSHIP NO MORE? Noon lamang Pebrero ay nagkasama sina Sharon at Gabby sa isang TV commercial, na naging daan upang magkaroon ng closure ang masalimuot nilang paghihiwalay bilang dating mag-asawa.
Matapos umere ang TVC noong February 10 ay nagpalitan pa ng positibong mensahe sina Sharon at Gabby sa isa’t isa.
Nasundan pa ito ng masaya nilang lunch meeting sa Makati City noong February 22.
Sa ulat ng PEP.ph (Philippine Entertainment Portal) noong February 23, nakasaad na ang lunch meeting ng ex-couple ay inayos ng former Star Creatives chief operating officer na si Malou Santos.
Kasabay nito ay marami sa mga tagasuporta nina Sharon at Gabby ang patuloy na umaasang posibleng magbalik-tambalan ang dalawa sa pelikula.
Ngunit wala pang isang buwan mula nang magkaayos ang ex-couple ay tila nagkaroon ulit ng hindi pagkakaunawaan ang dalawa.
Sa Instagram post ni Sharon noong March 4, inamin niyang tila na-misinterpret ang kanyang mga binitiwang salita tungkol kay Gabby sa ginawang TV interview ng Megastar para sa ABS-CBN lifestyle show na Rated K.
Pagsapit ng March 23, nagpahiwatig si Sharon na tila hindi na matutuloy ang dapat sana’y nilulutong proyekto nila ni Gabby.
GABBY'S IG POSTS. Sa panig ni Gabby, nananatiling tikom ang bibig ng Kapuso actor sa isyu.
Gayunman, hindi maiwasang mapansin ng netizens ang tila matalinhagang Instagram posts ng aktor.
Noong March 23 ay nagbahagi si Gabby ng quote card tungkol sa "timing."
At noong March 31, nagbahagi ang Kapuso actor ng quote card tungkol sa paninindigan sa "personal decision" na makapagbibigay ng "happiness" sa isang tao.
Kagabi, April 1, mayroon ding quote card si Gabby na nagsasabing huwag panay ang lingon sa nakaraan upang makamit ang "happiness."
Isang fan ni Sharon ang kumontra sa March 31 Instagram post ni Gabby.
Sinasabing ni-repost pa ni Sharon sa sariling Instagram account ang pagkontra ng netizen sa quote card ni Gabby.
Ngunit at press time ay deleted na ito sa Instagram account ng Megastar.