Kinumpirma ng isang taong malapit sa aktor na si Rocco Nacino na girlfriend na nga nito ang volleyball player na si Melissa Gohing.
Noong 2017 pa raw nagsimulang mag-date ang dalawa, at ilang buwan na rin daw ang kanilang relasyon.
Ayon pa sa source ng PEP.ph (Philippine Entertainment Portal), hangga't maaari ay gusto nina Rocco at Melissa na maging pribado ang kanilang relasyon kaya hindi sila nag-a-upload ng mga larawang magkasama sa kani-kanilang social media accounts.
Si Melissa ay dating player ng De La Salle University (DLSU) Lady Spikers.
Sa ngayon, siya ay naglalaro para sa Creamline Cool Smashers ng 2018 Premier Volleyball League (PVL).
Kumalat sa internet noong nakaraang linggo ang larawan nina Rocco at Melissa na kuha sa reception ng kasal ng volleyball star na si Cha Cha Cruz kay Ray Behag sa Tagaytay noong February 28.