Kasagutan sa isang dasal.
Ganito inilarawan ni Robin Padilla ang pagkikita at pagkakaayos nila ni Aljur Abrenica, ang fiancé ng anak niyang si Kylie Padilla.
Sa Facebook post ng Sana Dalawa Ang Puso star noong Lunes, February 19, sinabi ni Robin na: “Purihin Ang Panginoon! Isa sa mga Dasal ay nagkaroon ng kasagutan.”
Sinamahan ito ni Robin ng selfie picture nila nina Kylie at Aljur.
Mula nang ihayag nina Aljur at Kylie na engaged na sila nang dalawang beses, sa Japan at Pilipinas, hindi ito nagustuhan ni Robin.
Sinundan pa ito ng anunsiyo ng showbiz couple na buntis si Kylie at wala pa silang balak magpakasal dahil uunahin daw muna nila ang kapakanan ng bata.
Nagkaroon naman daw ng ilang attempts si Aljur na makipag-usap kay Robin, ngunit gusto ng ama ni Kylie na maikasal muna ang dalawa bago niya kausapin ang Asintado actor.
Sa naganap na pamamanhikan ng pamilya ni Aljur sa pamilya ni Robin noong Sabado, February 17, tila nabago ang ihip ng hangin.
Mukhang natanggap na ng beteranong aktor ang sitwasyon nina Aljur at Kylie dahil na rin siguro sa apong si Alas Joaquin.
Bali-balitang sa Hulyo 2018 magaganap ang inaasam-asam ni Robin na kasal ng anak at ni Aljur.
“SALAMAT AT HINDI KA NAGSAWA.” Isa sa masugid na naging tulay upang magkaayos ang magkabilang kampo ay ang misis ni Robin na si Mariel Rodriguz-Padilla.
Kaya naman sa isang post ni Mariel sa Instagram nitong Lunes din, February 19, nagpasalamat si Robin sa asawa na hindi raw nagsawang pag-ayusin sila ni Aljur.
Caption ni Mariel sa post niya ng larawan ni Robin kasama sina Kylie at Aljur, “Because FAMILY is EVERYTHING.”
Sa comments section, nag-iwan ng mensahe si Robin para kay Mariel: “Ikaw ang naging tulay @marieltpadilla maraming salamat at hindi ka nagsawa.”
Pinuri naman si Mariel ng ilang netizens dahil sa kanyang ginawa.
Unang nagkita si Robin at apong si Alas Joaquin sa birthday party ng anak nina Robin at Mariel na si Isabella sa The Fort, Taguig City, noong November 18, 2017.