Binuweltahan ni Kris Aquino ang isang Facebook account na nagkakalat ng fake news tungkol sa kanya.
Ngayong Biyernes, November 24, nilagay ni Kris sa Instagram ang screenshot ng post kung saan pinapalabas na ininterbyu ni Boy Abunda ang actress-host.
Sinabi umano ni Kris na kung si Mocha Uson ay kayang tumakbo bilang senador, siya pa kaya?
Sinabi pa umano ni Kris na tatalunin niya si Mocha sa pagka-senador.
Ang comment naman ng nag-post: “Talaga Kris? Sino naman kaya ang susuporta sayo? Kung PCOS Machine, we will never vote again no to Aquino!!”
Base sa mga status nito sa Facebook, makikitang supporter ni Pangulong Rodrigo Duterte ang nasabing netizen.
FAKE NEWS. Tahasang tinawag na #fakenews ni Kris ang post.
Aniya, dalawang buwan na ang nakalilipas nang huli silang mag-usap ni Boy, at isa itong business meeting at hindi interview.
“Our last communication was 2 months ago when he was turning over a few more endorsement details to my current management team.”
Lalo pang nairita ang 46-anyos na host dahil sa maling ang grammar ng quote na galing daw sa kanya.
“Kung sino man po ang nagsulat nito- if you will choose to invent quotes from me- GALINGAN NYO NAMAN. I am a stickler for correct grammar and subject-verb agreement: it isn’t IN CASE SHE PURSUE HER CANDIDACY, I need to correct you: it is IN CASE SHE PURSUES HER CANDIDACY,” pagtatama ni Kris.
“I know i am weird, hindi ako sa subject matter nairita, nabwisit ako na wrong grammatical quote ang na attribute sa ‘kin.”
ON BEING COMPARED TO MOCHA. Sa kabilang banda, nagpasalamat si Kris sa pagkakakumpara sa kanya kay Mocha.
Ani Kris sa nag-post na tinawag niyang Jhun: “[Whoever] you are Jhun & to the media team doing this you do have my GRATITUDE. Because in the online world, Ms. Uson is a ‘unicorn’... And I am a newbie.”
Ang “unicorn” sa larangan ng information technology ay isang asset ng tao o company.
Tumaas rin daw ang kanyang estado dahil sa pagkukumpara sa kanya kay Mocha.
“Yet you have elevated me by this comparison to her status. #Bongga"
Ikinumpara ni Kris si Mocha kay Miuccia Prada, ang Italian billionaire fashion designer at businesswoman, samantalang ikinumpara niya ang sarili kay Alessandro Michele, “the relatively new creative director of GUCCI” o isang baguhan.
Nagkomento rin si Kris sa akusasyong may balak siyang pasukin ang pulitika.
“Regarding political plans sa nagkakalat ng FAKE NA BALITA- while we still live in a DEMOCRACY & while i just remitted an online VAT payment for October 2017 of P2,164,429.67- let me just continue working in peace?
“Politics isn’t in my brain right now, sa kakagawa nyo ng ganitong balita baka in the end mapilitan akong bilhin from Culture Club ang rights to their song KARMA CHAMELEON as my campaign jingle.”
Ang binanggit niyang song ay sumikat noong 1983.