James Reid breaks silence on US concert promoter's allegations

Humingi ng paumanhin ang Viva talent na si James Reid sa fans nila ni Nadine Lustre sa Amerika dahil sa aberyang naganap nitong mga nakaraang linggo hinggil sa kanilang U.S. concert tour.

Nitong nakaraang Miyerkules, April 5, ipinahayag ng concert producer/promoter na si Elaine Crisostomo ang kanyang pagkadismaya sa JaDine dahil umano sa pambabastos na naranasan niya at ng kanyang staff.

Si Elaine ang producer/promoter ng San Francisco leg ng Always JaDine: US Tour 2017, na ginanap noong March 31, sa Chabot College, Hayward, California.

Ayon kay Elaine, bahagi umano ng pagbisita nina James at Nadine sa San Francisco ang isang lunch meet-and-greet session kasama ang fans, ngunit hindi raw sumipot ang dalawa.

Una na itong pinabulaanan ni Nadine sa pamamagitan ng kanyang tweets.

Sa isang press statement naman na nilabas ng Viva at ng promoters ng nasabing concert, nilinaw ng mga itong hindi bahagi ng kanilang usapan ang nasabing meet-and-greet session.

Ipinagtanggol din nila ang JaDine kaugnay ng mga akusyasyon ni Elaine.

STORIES WE ARE TRACKING

JAMES SPEAKS UP. Ngayong Sabado, April 8, si James naman ang nagpahayag ng kanyang saloobin tungkol sa isyu sa pamamagitan ng Twitter.

Sa kanyang unang tweet, humingi siya ng tawad sa fans na nagbayad ng $250 o P12,450 para sa nasabing event.

Pahayag ni James, "I'm sorry for the fans who were tricked into paying $250 for a brunch that was not approved. I didn't even know about it until the day after."

Binuweltahan din ni James ang promoter ng kanilang show sa Amerika.

Aniya, "Elaine Crisostomo is not a credible promoter and a liar. She still owes our production head (not Nadine @mjfelipe) $27,000."

Patuloy pa nito, "We went straight to our hotel room because of our 3am flight. Of course we're tired. And Ellaine never spoke to me until after the concert."

Pagtatapos ni James, "All the fans involved already know the truth. I hate to explain all this but I'm just annoyed that these lies are still being spread on TV."

Sa huli, ni-retweet pa ni James ang video ni Elaine na in-upload ng isa sa kanilang fan.

Sa video, maririnig si Elaine na sinasabing sold out ang concert nina James at Nadine, at magagaling ang mga ito.

Karugtog nito ang tweet na: "Make up your mind."