Nagkabalikan na ba sina Aljur Abrenica at Kylie Padilla?
Ito ang tanong ng fans matapos makita ang larawan ng dating magkasintahan na magkasama sa Japan.
Sa Instagram post ni Aljur ngayong araw, October 31, makikita ang larawan niya kasama ang ex-girlfriend na si Kylie.
Walang anumang caption na inilagay ang Kapuso actor kundi ang #shimokitazawa, kilalang commercial at entertainment district sa Setagaya, Japan.
May ilang naghinalang maaaring hindi si Kylie ang kasama ni Aljur sa picture.
Pero sa Instagram account ng Encantadia actress, mapapansin na ang mga post niya ay kuha rin sa Tokyo.
Ang pinakahuling post ni Kylie, halos kasunod ng post ni Aljur, ay tila isang tula kung saan nakasulat ang sumusunod: “the comfort on your shoulder what I've always wanted.”
Taong 2014 nang maghiwalay sina Aljur at Kylie.
Sa panayam noon ng Startalk kay Kylie, sinabi ng dalagang anak ni Robin Padilla tungkol sa pagtatapos ng relasyon nila ni Aljur, “Ewan ko bakit kailangang ganun yung nangyari. Nasayang sa walang-kuwentang dahilan.”