Nagbigay ng reaksiyon ang TV executive at aktres na si Charo Santos-Concio sa pagkadismayado ng award-winning director na si Lav Diaz sa kawalan ng suporta ng gobyerno sa local film industry.
Lead actress ang dating ABS-CBN president sa bagong pelikula ni Lav, Ang Babaeng Humayo, na nakapag-uwi ng Golden Lion award mula sa 73rd Venice Film Festival.
Ang Golden Lion ang top prize ng Venice Film Fest, isa sa tatlong pinakaprestihiyosong film festivals sa buong mundo; kabilang ang Berlin at Cannes.
Ikinalulungkot din daw ni Charo ang kakulangan ng pagtulong ng gobyerno sa Philippine cinema.
Aniya, “I guess, I think it's a reality that cinema is way below on the list of priorities… nakakalungkot.
“We're hoping, people from the industry are really just hoping that the government will also give the same value and the same support to the cinema industry as they do to others.
“Hope springs eternal. I hope that one day na mabibigyan din ng value at importansiya ang ating sining, ang pelikulang Pilipino.”
Nagsalita si Charo sa isyung ito sa grand press conference ng Ang Babaeng Humayo nitong Miyerkules, September 21, sa Dolphy Theater, sa ABS-CBN compound.
Ipalalabas na sa local theaters ang pelikula simula sa September 28.
PRAISES FOR LAV. Marami raw natutunan si Charo nang makatrabaho niya sa pelikula si Lav, kabilang na rito ang kababaang-loob at pagiging makabayan nito.
Aniya, “He's a brilliant man, but his brilliance doesn't define him.
“He's very grounded, he's a very humble person.
“And yung passion niya for cinema is the very reason why up to this day, he comes out with excellent movies.
“At saka yung pagmamahal niya sa Pilipino, pagmamahal sa bayan.
“Parating mahalaga yun sa bawat pelikulang ginagawa niya.
“The one thing that really makes him special is he's your friend by your side.
“Walang pagka-diyos, walang pagka-diva, wala, ano lang, gusto lang niya magkuwento.
“Gusto lang niyang magbigay ng magandang kuwento.”
Sa hiwalay na panayam, tinanong ng ilang press si Charo kung sa palagay niya ay karapat-dapat na itanghal na National Artist for Film si Lav.
Sagot niya, “I think he deserves it, he does.”
LAV’S LAMENT. Narito naman ang hinaing ng award-winning film director sa kakulangan ng suporta mula sa gobyerno pagdating sa pelikulang Pilipino.
Sa kanyang panayam kay Bayani San Diego ng Inquirer, sinabi ni Lav na humingi sila ng suporta mula sa Senate at Quezon City local government bago tumungo sa Venice, ngunit hindi sila nakakuha ng sagot mula sa mga ito.
Ang Film Development Council of the Philippines (FDCP) naman ay nagpaabot din ng kanilang tulong, ngunit kalahati lang daw ng naipangakong support/grant ang kanilang maibibigay.
Bukod dito, kailangan munang gamitin nina Lav ang kanilang sariling pera at i-reimburse na lang ang magagastos mula nila sa film festival.
Pahayag pa nito, “We were in the Main Competition of Venice. It was like the Olympics of cinema.
“In sports, medalists receive millions worth of incentives. They’re even given a house and lot.
“But why do filmmakers have to beg for support?
“Pag beauty contest, nababaliw ang Palasyo at Kongreso!”
Ngunit paglilinaw niya, “I am not complaining. I’m just saying…”