Isa nang Kapamilya ang dating TV5 contract star na si Ritz Azul matapos siyang pumirma ng two-year exclusive contract sa ABS-CBN ngayong araw, April 12.
Kasama sa naturang contract signing ang ama ni Ritz na si Richard Azul; gayundin sina ABS-CBN president Carlo Katigbak, ABS-CBN COO Cory Vidanes, ABS-CBN TV production head Lauren Dyogi, Dreamscape unit head Deo Endrinal, at Star Magic head Johnny Manahan.
Ayon sa Instagram account ng ABS-CBN Corporate Communications, ang unang magiging proyekto ni Ritz bilang Kapamilya ay ang primetime series na FPJ's Ang Probinsyano, na pinagbibidahan ni Coco Martin.
Nang tanungin kung ano ang pakiramdam niya ngayong isa na siyang ABS-CBN talent, sabi ni Ritz: “Out of words po ako. Sobrang blessed at sobrang saya po.”
Si Ritz ay naging runner-up sa artista search ng TV5 na Star Factor noong 2010.
Bilang isang Kapatid, naipakilala rin siya bilang isa TV5 Primetime Princesses—kasama sina Alex Gonzaga, Arci Muñoz, Eula Caballero, at Jasmine Curtis-Smith.
Kabilang sa mga naging teleserye niya sa TV5 ang mga sumusunod: Mga Nagbabagang Bulaklak (2011), Glamorosa (2011), Misibis Bay (2013), at For Love or Money (2013).
Nag-expire ang kontrata ni Ritz sa TV5 noong Enero 2016.
Bago ang pagpirma niya sa ABS-CBN, napanood si Ritz sa GMA-7 shows na Bubble Gang at Ismol Family.