Sinampahan ng Bureau of Internal Revenue (BIR) ng P3.6-million tax evasion case ang aktres at modelo na si Solenn Heussaff.
Ayon sa ulat ng ABS-CBN News ngayong araw, April 4, isinampa ng BIR ang kaso sa Department of Justice (DOJ).
Sinabi ng ahensiya ng pagbubuwis na hindi naaayos at hindi tama ang mga impormasyong naitala ng actress-TV host sa kanyang tax returns noong 2011, kung saan idineklara nitong ang kanyang gross income ay P6.73 million pesos lamang at taxable income na umabot naman sa P3.3 million pesos.
Ayon pa sa BIR, "Heussaff's underdeclaration is more than 30 percent and is prima facie evidence of fraud."
Base pa raw sa imbestigasyon ng ahensiya, kumita si Solenn ng halos P13.38 million noong 2011.
Ang mga kinita raw ni Solenn ay mula sa mga bayad sa kanya mula sa mga sumusunod na kumpanya, base na rin sa ulat ng Rappler.com: Innovitelle, Inc.; Publicis Jimenez Basic; San Miguel Brewery, Inc.; So One, Inc.; Intelligent Beaty Skin Solutions, Inc.; Golden ABC, Inc. (Penshoppe); Ginebra San Miguel, Inc.; Summit Publishing Co., Inc.; TAPE, Inc. (Eat Bulaga); Fresh N’Famous Foods, Inc.; MCA Music; GMA Network, Inc.; at Activations Advertising, Inc.
Dagdag pa ng ahensiya, "The BIR assessed her deficiency tax liability at P3.6 million, including surcharge and interest."
Kasama ring sinampahan ng kaso ng BIR ang accountant ni Solenn na si Teofilo C. Magno Jr. dahil sa pagsisertipika raw nito sa financial statement ng model-actress.
Samantala, nag-react naman si Solenn through her twitter account (@solennheussaff) tungkol sa kasong isinampa laban sa kanya ng BIR.
Sinabi niyang hindi niya alam kung ano ang nangyari.
Saad pa niya, "I'm an honest person. As transparent as it gets. Someone made a mistake and I have to fix it."
Kasalukuyan pang hinihintay ng PEP.ph (Philippine Entertainment Portal) ang official statement mula sa kampo ni Solenn, sa pamamagitan ng kanyang manager na si Leo Dominguez, kaugnay sa isyung ito.