Dinumog ng mga tao ang paghahain ni Annabelle Rama ng certificate of candidacy, ngayong umaga, October 5, sa opisina ng Comelec sa Cebu City.
Kakandidato si Annabelle bilang house representative ng Cebu City North District sa 2013 elections.
Nahirapan si Annabelle at ang kanyang pamilya na makapasok sa Comelec office dahil sa dami ng mga tao na nag-uunahan na makalapit sa kanila para kamayan sila at makunan ng litrato.
Ayon kay Annabelle, hindi siya nakaramdam ng pagod dahil sa mainit na pagtanggap sa kanya ng mga kababayan niya.
Tulad ng kanyang nakagawian, nagsimba si Annabelle kagabi, October 4, sa simbahan ng Sto. Niño at nag-alay ng misa ngayong umaga sa Cebu Metropolitan Cathedral bago siya nagpunta sa Comelec.
Kasama ni Annabelle sa pagdinig ng misa sa Cebu Metropolitan Cathedral ang asawang si Eddie Gutierrez at ang kanilang mga anak na sina Ruffa, Raymond, Richard, at Elvis.
Sinuportahan din siya ng mga stepson niyang sina Tonton Gutierrez at Ramon Christopher; at ng kanyang mga talent na sina Arci Muñoz, Ehra Madrigal, at Michelle Madrigal.
Infrastructure, education, health, at ang kapakanan ng mga senior citizen ang plataporma ni Annabelle para sa mga kababayan niya sa North District.