Nag-react na ang kampo ng StarStruck 2 Avenger na si Kirby de Jesus sa mga binitawang pahayag ng Sexbomb Girl na si Johlan Veluz sa S-Files last Sunday.
Sa interview ni Johlan, sinabi nito na kakahiwalay lang daw nila ni Kirby. Marami raw kasi ang hindi pabor sa kanilang relasyon, lalo na raw ang kani-kanilang mga ina. Pero ang pinakamalaking dahilan daw ng pakikipaghiwalay ni Johlan kay Kirby ay dahil may "third party" raw.
"E sino raw ba yung sinasabi niyang third party?" tanong ng road manager ni Kirby na si Manny Valester. "Bakit hindi niya sabihin kung sino? Sa pagkakaalam namin ay wala naman."
Dagdag pa ni Manny, "Tinanong na namin si Kirby at nagtataka rin yung bata kung ano raw yung ini-emote at iniiyak ni Johlan sa TV. Sa pagkakaalam niya, may mga hindi sila napagkasunduan ni Johlan kaya nagdesisyon silang maghiwalay."
Ayon pa kay Manny, hindi na raw issue yung hindi gusto si Johlan ng mommy ni Kirby at gayundin ang mommy ni Johlan na ayaw kay Kirby.
"Kung yun ang dahilan, sana hindi sila tumagal ng almost two years, di ba? E bakit kahit na ayaw ng mga magulang nila na magkaroon sila ng relasyon ay tumagal pa rin sila? Ibig sabihin ay hindi naman siguro nakilalam ang mga nanay nila. So may ibang issue pa kung bakit sila naghiwalay," pagtataka ni Manny.
Yung tungkol naman daw sa kotseng nabangga ni Kirby noong December 30 ay totoong pag-aari yun ni Johlan, sabi ni Manny. Ipinahiram daw iyon ni Johlan kay Kirby, pero nabangga nga. Ang hindi raw totoo ay yung paratang ni Johlan na hindi ipinaayos ni Kirby ang nabanggang kotse.
"Nasa talyer yung kotse ni Johlan at yung nakabangga kay Kirby ang nagpapaayos. Mali naman yung sinasabi na pinabayaan ni Kirby. Hindi naman ganun yung bata. Pero ang umako ng pagpapagawa sa kotse ni Johlan ay yung nakabangga kay Kirby," depensa ni Manny sa young actor.
"Hindi kasi kayang solohin ni Kirby ang pagpapaayos ng kotse kasi hindi
naman malaki ang kinikita niya ngayon," sabi pa ni Manny. "Isa nga lang ang regular show niya [Ganda Ng Lola Ko sa QTV 11], kasi nag-aaral yung bata. Bumabawi na lang si Kirby kapag may guestings siya, ‘tulad ngayon, kasama siya sa Magic Kamison."
Hinahamon ng kampo ni Kirby na sabihin na ni Johlan kung sino ang tinutukoy niyang third party para matapos na ang isyu.