Imagine habang nasa himpapawid at nakasakay sa eroplano, biglang tutunog ang emergency alarm. Ano ang maiisip mo?
Ganito ang karanasan ng isang netizen dahil sa “madramang flight.”
Trending sa social media ang Facebook post ng netizen na si Travelosyo, a.k.a. Cai Dominguez, nitong February 12, 2024.
Bungad ng kanyang post (published as is): "Ito na ata pinaka madramang flight na nasakyan ko."
Habang nasa himpapawid kasi ang sinasakyang eroplano, bigla raw tumunog ang emergency alarm dahilan para “tumigil yung mundo” ng uploader.
Marahil ay nangamba rin ang iba pang pasahero dahil sa pangyayari.
Habang nasa himpapawid ang Cebu Pacific flight 5J 449, from Manila bound to Iloilo, biglang umingay ang alarm ng eroplano.
Sabi ng uploader, bigla siyang nag-overthink. Nataranta at naisip kung kakailanganin ba niyang buksan ang emergency door dahil malapit siya sa kinaroroonan nito.
Post ng uploader iyon ang first time na narinig niya ang emergency alarm sa buong buhay niya kapag nakasakay sa eroplano.
Aniya, "Edi nag overthink na ko— sheeeet sa isip-isip ko magbubukas ba ko ng emergency door?"
Bigla raw nagsalita ang flight captain at dito nalaman kung bakit tumunog ang emergency alarm.
“To someone inside the front lavatory you’re not allowed to smoke, you’re jeopardizing the safety of this flight.
"You will be sent to the police once we landed at Iloilo Airport,” sabi ng piloto via public address system.
Read: Passenger nearly removed from flight for not wearing a bra
Mabilis namang kumilos ang cabin crew. In-escortan nila ang pasaherong nag-vape papunta sa kanyang kinauupuan at kinausap.
Nabulabog daw ang mga pasahero kaya dinig na dinig ang kanilang pag-uusap dahil sa nangyari.
Paglapag ng eroplano sa Iloilo airport, na-hold ang kanilang flight.
Sinabi ng uploader na pumasok sa eroplano ang airport security at mga pulis para puntahan ang pasaherong nag-vape.
In-escort-an daw ito palabas, kaya kitang-kita rin ng mga pasahero ang salarin, na sa tantiya ng uploader, ay nasa mid-20s.
Pinagsasabihan rin daw ang pasahero tungkol sa security procedures.
Paalala ng uploader, “Pigilan nyo yung pangangati nyo mag smoke or mag vape sa plane.”
Samantala, pinuri rin ng uploader ang Cebu Pacific flight crew dahil sa maayos nilang pag-handle sa sitwasyon.
Komento nito: “Kudos nga pala sa mga staff ng Cebu Pacific Air kasi ang kalmado lang nila. Alert sila pero calm. Literal na in case of emergency do not panic.”
Umani rin ng matinding batikos ang pasaherong nag-vape dahil hindi raw ito nakahintay lalo't isang oras lang naman daw ang biyahe mula Manila papuntang Iloilo.
Read: Love in the Workplace: Arvin and Dianne Dizon's journey from colleagues to couple
VAPES ARE ALLOWED TO BE HANDCARRIED
Ang vape o e-cigarettes ay pinapayagang i-handcarry ng mga pasahero, huwag lamang gagamitin sa loob ng eroplano.
Makikita sa X (formerly known as Twitter), na aktibo ang Cebu Pacific sa pagsagot sa mga netizens na nagtatanong kung puwedeng i-handcarry ang vape o e-cigarettes.
Ganito ang sagot ng Cebu Pacific sa X sa mga netizens na nagtatanong (published as is): “Please be advised that Vape/E-cigarettes are permitted for hand carry baggage. Kindly make sure that batteries are removed and must be individually protected to prevent accidental activation. The vape juice should also not exceed 100ml per bottle. Hope this helps!”
Malinaw ang paalalang ito. At ang paglabag dito ay may karampatang parusa.
Sa Republic Act No. 11900, or the Vaporized Nicotine and Non-Nicotine Products Regulation Act, ipinagbabawal ang pagvi-vape sa indoors at public spaces at may multa mula PHP5,000 hanggang PHP20,000.
May posibilidad din ma-ban sa airline, dagdag ng uploader.