Kilala ang Donsol, Sorsogon bilang pasyalan para sa mga turistang hangad na makakita at makasama ang mga butanding sa dagat.
Sa katunayan, ipinagdiriwang sa Donsol ang Butanding Festival taun-taon.
Pero simula ngayong taon ay may idadagdag na festival ang isang barangay.
Bukod kasi sa mga butanding, kilala rin dito ang isa pang uri ng yamang dagat: ang giant squids.
Ang higanteng pusit, o tamisan kung tawagin sa Donsol, ay kilalang produkto ng Brgy. Santa Cruz, Donsol.
Ito ang pangunahing ikinabubuhay ng mga residente rito.
Read also:
- Giant Blue Marlin sa Palawan, nabingwit at nagkakahalaga ng PHP81,000
- Dambuhalang blue marlin na nahuli sa Cagayan, 210 kilos ang bigat!
At unti-unti na ring dumarami ang mga turista na dumarayo sa Brgy. Santa Cruz para makakita ng mga higanteng pusit.
Karaniwang tumitimbang ng sampung kilo o higit pa ang mga tamisan, at isang metro ang haba.
“Yung giant squid po, iyan po talagang pinagmamalaki po namin, produkto ng barangay,” sabi ni Kapitan Arlon Pendor ng Sta. Cruz, ulat ng Bicol.PH.
“’Yung mga fisherfolks natin na involved diyan, iyan po talaga ang pinagkakakitaan every day.
“Saka marami pong dumadayo sa amin para pagkakitaan din.”
Si Hernando Razo ay mangingisda sa barangay na sampung taon nang nanghuhuli ng tamisan.
“Hindi naman parehas [ang huli], may mga araw na wala. Kung minsan meron.
“Kapag sinusuwerte nakakalimang libo, minsan apat na libo,” aniya sa Bicol.PH ukol sa kita.
Sabi naman ni Arlene Adorsa, buyer ng giant squid, hindi rin pare-pareho ang dami ng nabibili nilang pusit sa barangay.
Pero bawi niya, “Pag season talaga, nakaka-600 kilos kami.”
Hinuhuli ang tamisan gamit ang burong isda na isinasakbit sa isang pain na itsurang payong.
Sinasabitan din ito ng pailaw o blinker para makaakit ng tamisan.
Nahuhuli ang mga tamisan sa malalalim na bahagi ng dagat, na tinatayang 200 metro ang lalim.
Sabi naman ng local government officials, ipino-promote na rin nila ang giant squid bilang panghatak ng mga bisita.
Ilulunsad ang kauna-unahang Tamisan Festival sa Brgy. Santa Cruz mula Mayo 1 hanggang 7, 2023.
