Nagdaos ang Office of the City Veterinarian (OCVet) ng Zamboanga City ng “Asao Lechon Festival” noong October 10, 2022, para sa promotion ng industriya ng pagbababuyan sa lungsod.
Pagpapakita rin ito sa publiko na ligtas ang mga alagang baboy dito sa kabila ng paglaganap African swine fever (ASF).
Ang festival na isinagawa sa pakikipagtulungan ng Lechoneros de Zamboanga ay bahagi ng Zamboanga Hermosa Festival 2022.
Ayon kay Dr. Mario Arriola, city veterinarian, “This is to prove that our hogs are safe for consumption.”
Matatandaang isinailalim ng Department of Agriculture ang Zamboanga City sa red zone dahil sa patuloy na pagtaas ng kaso ng ASF sa lungsod.
Batay sa datos ng OCVet, umabot na sa 4,146 na baboy sa lungsod ang namatay dahil sa ASF simula noong May 2022.
Nasa 1,013 hog raisers naman ang apektado ang negosyo.
May kabuuang 34 barangays sa lungsod ang tinamaan ng ASF.
Nagkaroon naman ng pakontes sa Asao Lechon Festival para sa pinakamasarap na litson, pinakamalutong, best float, at people’s choice roasted pig.
Ang nagwagi sa bawat kategorya ay tumanggap ng PHP10,000 premyo.
Ang mga kalahok na hindi nagwagi ay pinagkalooban ng consolation prize na PHP5,000.
Matapos ang pamamahagi ng award, libreng ipinatikim at ipinauwi sa mga manonood ang mga litson.