Nagpamalas ng husay at galing ang magkapatid na Rose Jean at Rosegie Ramos sa Asian Youth and Junior Weightlifting Championships na naganap mula July 15-25, 2022 sa Tashkent, Uzbekistan.
Nag-uwi si Rose Jean, 16, ng apat na medalyang ginto, isang silver, at isang bronze sa 45-kilogram category-women’s division.
Ang kanyang ate na si Rosegie, 18, ay nasungkit naman ang tatlong medalyang ginto sa 49-kilogram category-women’s division.
Kaya naman pinagkalooban ng City Government of Zamboanga ng PHP1.5 million cash incentives ang magkapatid na Zamboangueña weightlifters at ang kanilang coach na si Allen Diaz.
Si Rose Jean ay tumanggap ng PHP650,000 , habang si Rosegie naman ay nakakuha ng PHP375,000.
Pinagkalooban naman si Allen ng PHP512,500.
Mismong si Zamboanga City Mayor John Dalipe (L) ang nag-abot sa magkapatid na Rose Jean (2nd from L) at Rosegie Ramos (2nd from R) at sa coach nilang si Allen Diaz ng kanilang mga tseke pagkatapos ng ginanap na flag-raising ceremony sa harapan ng city hall noong September 19, 2022.
Ang pagkakaloob ng cash incentives sa mga taga-Zamboanga na makapag-uuwi ng medalya mula sa national and international competitions ay batay sa City Ordinance 565 ng lungsod.
Matatandaang taga-Zamboanga City rin si Hidilyn Diaz, ang kauna-unahang Filipino weightlifter na Olympic gold medalist.
Pinsan ni Hidilyn si Allen na coach ng magkapatid na Ramos.
Si Allen din ang unang nagturo kay Hidilyn ng basics ng weightlifting.