Nitong March 15, 2022 ay nakatanggap si Niño Jasper Conje Gomez, 23, mas kilala bilang Jasper, ng PHP30,000 cash incentive at plaque of recognition.
Bigay ito ng local government ng Daan Bantayan, Cebu, sa pamamagitan ni Mayor Sun Shimura.
Ang incentive ay bilang pagkilala sa kanyang paghahatid ng karangalan sa Daan Bantayan.
Top 5 si Jasper sa June 2021 Naval Architecture and Marine Licensure Examination.
Nagtapos siya ng Bachelor of Science in Naval Architecture and Marine Engineering sa University of Cebu noong March 2020.
Academic scholar siya noong 2015, at working scholar mula 2016 hanggang 2019.
Si Jasper ang ikalima sa kanilang walong magkakapatid.
Bago ang incentive at pagkilala na natanggap niya sa kanilang munisipalidad, una na siyang nakatanggap ng PHP25,000 mula sa Cebu City government noong October 18, 2021.
Si Cebu City Councilor at dating PBA player Donaldo “Dondon” Hontiveros ang nag-abot sa kanya ng kanyang incentive.
Bukod naman sa pagiging naval architect ay isang professional artist si Jasper.
Mahusay siya sa portrait painting, partikular sa paggamit ng charcoal powder and graphite pencils.
Noong April 1, sa kanyang Facebook post ay ibinahagi niya ang kanyang career plan.
Ani Jasper, “Enjoying my few days left as a civilian...”
Magsisimula na kasi siyang mag-training bilang Philippine Navy.
Ayon sa DaanbantayanLGU, pangarap ni Jasper na maging malaking bahagi sa pagdidisenyo at modernisasyon ng mga barkong pandigma ng Pilipinas.