Kamakailan ay nag-trending ang batang lalaking si Angel dahil nilibre nito ng buko juice ang biker na si Clark Lynden Canlas.
Marami ang natuwa sa nabuong friendship ng dalawa.
Nangako rin noon si Clark sa isa niyang Instagram post na tutulungan niya si Angel.
Nitong October 19, 2021, nag-upload ng video si Clark sa kanyang YouTube channel habang nag-a-assemble ng isang bike.
Aniya sa simula ng video, “Gusto kong magpasalamat kay Lovely Mendiola, pati sa mga members ng Discord na bumuo ng fundraising para makapagbigay ng bike kay Angel.”
Ang 12th birthday ni Angel ay noong October 11. Nang araw ring iyon dinala ni Clark ang regalo sa kaibigan.
ANG EMOTIONAL NA MULING PAGKIKITA NG MAG-BFF
Sa video pa rin, matapos niyang mabuo ang bisikleta ay bumiyahe na si Clark patungong Magalang, Pampanga, para puntahan si Angel.
Kasama niya ang mga netizens na nagbigay nito.
Halata naman ang pagkasabik ng bata nang makita ang kaibigan. Agad din itong nagsuot ng facemask.
Wala itong kamalay-malay sa sorpresang matatanggap.
“Na-miss kita,” ani Angel kay Clark habang naglalakad sila. “Tagal na rin kitang hinahanap. Sabagay, dami mo namang ginagawa.”
Tumawa lang si Clark. Nang malapit na sila sa lugar kung saan naka-park ang bike, tanong niya kay Angel, “Di ba gusto mo ng bike?”
“Oo...” agad nitong sagot. “Asan na?”
“Ayan, o...” At itinuro ni Clark ang binuong bike para kay Angel.
“Oh, no!” paulit-ulit na bulalas ng bata. “Oh, my God!”
Hindi ito makapaniwala habang hinahaplos ang bike.
“Sa iyo iyan,” ani Clark. “Ayan, may bike ka na.”
Tanong pa rin ng nasorpresang bata, na emotional na ang boses, “Akin ito?”
Pagtitiyak ni Clark, “Oo, sa iyo iyan,”
Tuluyan nang napahagulhol si Angel at yumakap nang napakahigpit sa kaibigan.
Inalo ito ni Clark. “Huwag ka nang iiyak. Magba-bike ka na. Sige na, sakyan mo muna.”
At inalalayan nito ang batang kaibigan para makasakay at ma-test ang bike.
Sinabihan din niya ito na magpasalamat sa mga nag-donate, na buong galang namang ginawa ni Angel.
ANGEL MAY SPECIAL NEEDS KAYA KAILANGAN NG SUPORTA
Tuwang-tuwa sina Clark at ang mga nagbigay ng bike kay Angel nang simulan na nitong sakyan ang kanilang birthday gift dito.
Muling umani ng papuri mula sa netizens ang bagong kabanatang ito sa friendship nina Clark at Angel.
Nabanggit naman ni Clark na may health condition ang kaibigan.
“Si Angel ay may mild autism po. Hindi po siya nakakapag-aral sa regular school. Kailangan po niya ng special education.”
Problema ng pamilya nito ang pampa-check-up kay Angel.
Ayon kay Clark, may nabuo naman na grupo ng mga netizens na handang tumulong dito.
Aniya, “Galing po silang Mindanao, norte, Visayas region. Talagang hindi ko po sila kilala, pati po yung mga nag-send ng pera.”
Malaking bagay aniya ang social media dahil marami ang tumutulong kay Angel.
Ani Clark, “Talagang ang social media kung minsan ay lason or toxic talaga, pero hindi lahat.
“May mga magagandang bagay din po na nangyayari sa social media na puwedeng maka-inspire sa ibang tao.”
Nag-post din siya ng picture nilang dalawa ni Angel habang nagba-bike noong October 21.
Ang kanyang caption: “We make a living by what we get, but we make a life by what we give. And no one has ever become poor by giving. Happy to see your smile, Angel. From buko to bike real quick!”
Use these Lazada vouchers when you shop or order online. Marami pang ibang coupons dito.