Meet Genette Mujar, isang fashion designer na based ngayon sa Canada.
Siya ang owner at chief executive officer ng Gnetz Design clothing line.
Pero bago siya naging fashion designer at naitayo ang kanyang sariling clothing line, nagsimula muna si Genette bilang caregiver sa Canada.
Tubong-Daraga, Albay, at nag-aral sa Bicol University, lumipad siya patungong Canada noong 2007.
Nagtrabaho si Genette bilang caregiver, pero hindi niya isinuko ang kanyang pangarap na maging fashion designer.
Sa ulat ng The Filipino Channel (TFC) News, sapat lamang ang sahod nito bilang caregiver para mapaldalhan ang kanyang pamilya sa Pilipinas.
Ang natitirang pera ay ipinambibili niya ng mga damit sa mga thrift store.
Sabi niya sa ulat, “Hahanapin ko iyon isa-isa yung mga branded, na outdated, na sale.
“In the end, ire-restyle ko siya para, at least, meron akong magandang panglabas [na damit].”
Kalaunan, sa edad na 50, sumugal si Genette na mag-loan para pang-tuition sa kursong fashion design.
Ayon sa kanyang Facebook page, nag-aral siya sa Visual College of Art and Design sa Vancouver.
Sabi ni Genette sa kanyang post, “I had an opportunity to study here, why not grab it, right?”
“And I know I can make it. If others can, why can’t I?”
Hindi naging madali ito dahil pinagsabay ni Genette ang kanyang pagtatrabaho bilang caregiver sa umaga at pag-aaral sa hapon.
Pero nagbunga ito dahil natupad niya ang pangarap na maging fashion designer at magkaroon ang kanyang sariling clothing brand.
Nagagamit ang designs ni Genette sa magazine photo shoots, at nakakatrabaho niya ang mga sikat na photographers at make-up artists.
Na-tap din siya bilang designer ng ilang candidates ng Binibining Pilipinas International Canada.
Ang inspirasyon naman ng kanyang mga disenyo ay ang Filipiniana.
Kahit sa kanyang mga post, hangad ni Genette na magsilbing inspirasyon ang kanyang success story.
Payo niya, “Kung anuman yung mga bagay na they’re passionate with, huwag silang matakot.
“Just to do it, dahil malay mo, you’re better than them.”