Milyonarya sa edad na 16 anyos. Nagawa niya ito sa loob lamang ng isang taon.
Ito ang achievement ng teenager at Grade 10 student na si Mica Irish Oloris mula sa Cavite City.
Naging certified milyonarya si Mica dahil sa online selling ng beauty products.
Nagawa niya ito sa tulong ng kanyang inang si Irene Oloris, na isang businesswoman.
Sabi ni Mica, “Kasama ko po si Mama sa lahat ng pag-start, pati pag-travel ko po. Sinupport po ako at ginuide niya po ako sa lahat."
Ikinatutuwa rin daw ng teenager na hindi nasayang ang kanyang pagsisikap, lalo pa't sobra-sobra pa nga raw sa kanyang inaasahan.
Aniya, “Syempre naman po naging masaya ako dahil bihira lang po sa ka-age ko po ‘yung magkaroon ng PHP1 million agad.”
Naitampok ang kuwento ni Mica sa GMA-7 early-morning talk show na Unang Hirit, noong June 3, 2021.
Hindi rin naging madali para kay Mica ang pagnenegosyo dahil isinabay niya ito sa kanyang pag-aaral.
Pero naitawid niya pareho ang pagnenegosyo at pag-aaral dahil sa time management.
Conscious effort naman ni Irene na turuan ang anak sa online selling para may ibang pagkaabalahan.
HER MOM'S GUIDANCE
Bukod sa online selling, may spa business din ang ina ni Mica.
Lahad ni Irene, “Kasi siyempre at her age, iyan yung tipong ano, kinikilig-kilig muna sa mga crush, di ba?
“Parang do’n mula sila mas nakaka-focus.”
Naisip daw ng businesswoman na impluwensiyahan ang kanyang anak lalo’t ngayong pandemya ay maraming kabataan ang nagkakaroon ng mental-health issues.
“Nakita ko kasi na nagkakaroon yung mga kabataan ngayon ng… yung medyo anxiety, depression.
“So, iniba ko yung focus niya at in-introduce ko sa kanya yung business.”
Mabilis naman daw natuto si Mica dahil bata pa lamang, namulat na siya sa pinagkakakitaan ng ina.
Proud si Irene na may naipundar na si Mica sa murang edad.
Kuwento pa niya, “Since bata pa lang naman siya, sinasama ko na siya sa negosyo, kaya medyo hindi na nahihirapan itong si Mica.
“Sobrang proud talaga ako kay Mica, yung mga na-achieve niya."
Sabi pa ni Irene noong ka-edad niya ang kanyang anak ay laro lang ang inaatupag niya, "Kasi, siyempre, at that age siguro nagtsa-Chinese garter pa yata ako noong time na iyon.”
Ito naman ang payo niya sa gaya niyang mga magulang pagdating sa kanilang mga anak.
“Dapat ang gagawin sa bata is yung prepare natin yung mindset nila, na kailangan magkaroon sila ng proper mindset in terms of business.”
Samantala, may advice rin si Mica sa mga kabataang gaya niya.
“Dream at a very young age po kasi wala naman pong limit iyan sa lahat, e.
“Mas maganda po yung mag-start ka nang maliit hanggang mag-dream ka po nang malaki para may ma-ano na rin po sa future.”
Para hindi mauwi sa wala, ang naipon ni Mica ay ipinambili na niya ng property sa Zambales.
Ang pinag-iipunan naman niya ngayon ay ang kanyang pangkolehiyo.