Malayo na ang narating ni Neovadi Ariola, ang overseas Filipino worker (OFW) na dating taxi driver sa Tondo at ngayon ay isang successful businessman sa Brunei.
Kung noon ay umaasa lamang siya sa boundary ng pagiging taxi driver, ngayon ay ilang negosyo na ang kanyang naipundar—tulad ng mini-grocery, CCTV installation business, mga salon, at car rental business.
Nabaon man siya sa utang na umabot ng PHP20 million noon, nagawa naman niyang mabayaran ito dahil sa mga pumatok na negosyo, ulat ni Ian Cruz ng GMA Integrated News.
Lakas ng loob ang naging baon ni Neovadi para makipagsapalaran sa ibang bansa at mabago ang kanyang buhay.
Aniya kung hindi siya naglakas-loob, "Siguro hanggang ngayon taxi driver pa rin ako. Kasi nagre-rent lang naman ako ng taxi.
“So, ang purpose ko kaya ako nagpunta ng Brunei [ay] para makabili ng taxi.”
Pero higit pa ang nangyaring pag-asenso sa buhay ni Neovadi sa pangingibang-bansa niya.
Read:
- OFW nagkuwento tungkol sa pagiging nanny sa royal family sa Riyadh, Saudi Arabia
- Pinoy mailman in Los Angeles retires after 22 years: "This is it. I’m done."
TAXI DRIVER TO BUSINESSMAN
Tubong-Tondo, si Neovadi ay walong taon muna naging taxi driver sa Maynila.
Nagpunta siya sa Brunei noong 2001 at naging driver din doon.
Kalaunan ay nalipat siya bilang merchandiser sa isang grocery at nakabisado ang pasikut-sikot sa tindahan, hanggang sa magtayo na siya ng sarili niyang mini-mart.
Taong 2011 ay nagkautang si Neovadi na umabot ng PHP20 million, sabi sa GMA News report.
Pero hindi nagpatinag si Neovadi. Pinasok niya rin ang CCTV installment business sa Brunei.
Nagkaroon siya ng maraming kliyente—government agencies, fast-food businesses, at iba pang establishments.
Sa loob lang ng tatlong taon ay nakabangon na si Neovadi at nabayaran ang malaking utang.
Sabi niya, “Masarap sa pakiramdam na nakita mo yung bumagsak ka, bumangon. Wag lang titigil…”
Nakapagpatayo na rin siya ng mga salon at car rentals sa Brunei at nakapagbigay ng trabaho sa mga OFWs doon.